ក្រុមហ៊ុនអាកាសចរណ៍ក្នុងតំបន់ចំនួន៣បានចាប់ផ្ដើមជើងហោះហើរចេញ និងចូលកម្ពុជាឡើងវិញកាលពីដើមខែឧសភានេះ

វិបត្តិកូវីដ១៩ បានធ្វើឱ្យវិស័យអាកាសចរណ៍ពិភពលោកធ្លាក់ក្នុងវិបត្តិយ៉ាងធ្ងន់ធ្ងរ ដោយក្រុមហ៊ុនអាកាសចរណ៍ជាច្រើនត្រូវបានបង្ខំចិត្តកាត់បន្ថយប្រតិបត្តិការ ឬបិទជើងហោះហើរទាំងស្រុង ដោយសារតែចំនួនអ្នកដំណើរមានការធ្លាក់ចុះយ៉ាងគំហុក ស្របពេលដែលមានការបិទច្រកព្រំដែនអន្តរជាតិ។

យ៉ាងណាមិញ យោងតាមរបាយការណ៍របស់សារព័ត៌មាន Khmer Times កាលពីដើមខែឧសភានេះ មានក្រុមហ៊ុនអាកាសចរណ៍ក្នុងតំបន់ចំនួនបីបានចាប់ផ្ដើមធ្វើការហោះហើរឡើងវិញចូល និងចេញពីប្រទេសកម្ពុជា។ ក្រុមហ៊ុនទាំង៣នោះ រួមមាន ក្រុមហ៊ុន Angkor Air ក្រុមហ៊ុន China Air និងក្រុមហ៊ុន Eva Air។ ការសម្រេចចិត្តនេះត្រូវបានធ្វើឡើងបន្ទាប់ពីវិបត្តិកូវីដ១៩ក្នុងតំបន់មានសភាពធូរស្បើយ។

ក្រៅពីនេះក្រុមហ៊ុនអាកាសចរណ៍ធំៗ ដូចជា Qatar Airways ក្រុមហ៊ុន Cathay Pacific ក្រុមហ៊ុន Thai Airways និងក្រុមហ៊ុន Emirates ក៏គ្រោងនឹងដាក់ដំណើរការសេវាកម្មរបស់ខ្លួនឡើងវិញនៅចន្លោះខែមិថុនា និងកក្កដាខាងមុខនេះផងដែរ បើយោងទៅតាមរបាយការណ៍ដដែល។

ទោះបីជាមានការបើកជើងហោះហើរឡើងវិញក៏ពិតមែន ប៉ុន្តែដើម្បីការពារសុវត្ថិភាពពីមេរោគកូវីដ១៩ ក្រុមហ៊ុនអាកាសចរណ៍ទាំងអស់នឹងអនុវត្តតាមវិធានការគ្រប់គ្រង និងការពារអនាម័យយ៉ាងម៉ឺងម៉ាត់ ពោលគឺតម្រូវឱ្យអ្នកដំណើរប្រើប្រាស់សម្ភារការពារអនាម័យយ៉ាងខ្ជាប់ខ្ជួន ធ្វើតេស្តឈាមនៅនឹងកន្លែង ព្រមទាំងអនុវត្តតាមវិធានការរក្សាគម្លាតសង្គម (Social Distancing) ថែមទៀតផង។ ចំណែកឯបុគ្គលិកនៅលើយន្តហោះវិញនឹងតម្រូវឱ្យពាក់សម្លៀកបំពាក់ការពារមេរោគកូវីដ១៩យ៉ាងពេញលេញ៕