អ្នកជំនាញនៅក្នុងវិស័យអចលនទ្រព្យលើកឡើងថាចំនួនអគារខ្ពស់ៗកំពុងកើនឡើងជាលំដាប់នៅក្នុងរាជធានីភ្នំពេញរយៈពេលជិតមួយទសវត្សរ៍ចុងក្រោយនេះមុខមាត់រាជធានីភ្នំពេញបានផ្លាស់ប្តូរយ៉ាងឆាប់រហ័សតាមរយៈការលេចឡើងនូវសំណង់អគារខ្ពស់និងធំៗជាច្រើន។ កត្តានេះ ត្រូវបានអ្នកជំនាញលើកឡើងថាមានកត្តាសំខាន់មួយគឺបណ្តាលមកពីកំណើនប្រជាជនមកកាន់កើនឡើងខ្ពស់។
ការលើកពីសំណាក់ក្រុមអ្នកជំនាញនៅពេលនេះ ត្រូវបានបង្ហាញឡើងតាមរយៈវេទិការ ស្តីពីការវិវត្តន៍នៃវិស័យអចលនទ្រព្យកម្ពុជា ដែលរៀបចំឡើងដោយក្រុមហ៊ុន Keller William Realty នាមជ្ឈមណ្ឌលសហប្រតិបត្តការកម្ពុជា-កូរ៉េ កាលពីថ្ងៃទី៥ ខែវិច្ចិកា។
នាយកប្រតិបត្តិក្រុមហ៊ុន KW-កម្ពុជា លោក ភូ សម្បត្តិ បានលើកឡើងនាឱកាសនោះថា ក្នុងរយៈពេល ១០ ឆ្នាំចុងក្រោយនេះវិស័យសំណង់នៅកម្ពុជា ពិសេសរាជធានីភ្នំពេញបានរីកចម្រើនយ៉ាងឆាប់រហ័ស ដោយមកទល់ពេលបច្ចុប្បន្ននេះនៅរាជធានីភ្នំពេញមានសំណង់អគារខ្ពស់ៗច្រើន។ តាមធម្មតាពេលណាមានអគារខ្ពស់ៗវាបង្ហាញពីការរីកចម្រើនរបស់ទីក្រុង។
កំណើនប្រជាជនជំរុញការអភិវឌ្ឍអគារខ្ពស់
លោកបានបន្ថែមថា លោកបានបន្តថា ការមានអគារខ្ពស់ៗច្រើនវាបង្ហាញពីភាពស៊ីវិល័យរបស់ទីក្រុង ហើយវាបង្ហាញពីសក្តានុពលនៃសេដ្ឋកិច្ច និងធ្វើឲ្យអ្នកវិនិយោគមានទំនុកចិត្តមកបោះទុនវិនិយោគកាន់តែច្រើននៅកម្ពុជា។មិនតែប៉ុណ្ណោះ ស្របពេលជាមួយគ្នានេះ គេក៏សង្កេតឃើញ សំណង់អគារខ្ពស់ជាច្រើនកំពុងបន្តសាងសង់ជាច្រើននៅក្នុងទីក្រុងភ្នំពេញនាប៉ុន្មានឆ្នាំចុងក្រោយ ដោយសារតែមានកំណើនប្រជាជនមកកាន់តែក្រុងកាន់តែច្រើនឡើង។
ក្រសួងរៀបចំដែនដី នគរូបនីយកម្មនិងសំណង់ លើកឡើងថា វិស័យសំណង់នៅតែមានសុខុមាលភាពល្អនៅក្នុងឆ្នាំ២០១៩ នេះ ខណៈ វិស័យអចលនទ្រព្យ និងសំណង់នៅកម្ពុជាបានដើរតួនាទីជាចលករមួយដ៏សំខាន់ក្នុងការជួយទ្រទ្រង់ដល់កំណើនសេដ្ឋកិច្ចជាតិ។
ជាងនេះទៀត តាមរយៈរបាយការណ៍ស្តីពី បូកសរុបលទ្ធផលការងារ៩ខែ ឆ្នាំ២០១៩ និងទិសដៅការងារបន្តរបស់ក្រសួងរៀបចំដែនដីនគរូបនីយកម្មនិងសំណង់ ដែលបានចេញផ្សាយកាលពីពេលថ្មីៗនេះបានឱ្យដឹងថា គិតត្រឹមរយៈពេល ៩ ខែដើមឆ្នាំនេះ សំណង់នៅទូទាំងប្រទេសមានចំនួនសរុប ៣.៤៣៣ គម្រោង។
ចំនួនអគារខ្ពស់ៗនៅក្នុងទីក្រុង
បន្ថែមពីនេះ បើនិយាយដល់គម្រោងអគារខ្ពស់ៗចាប់ពី ៥ ជាន់ឡើងទៅនៅ ទូទាំងប្រទេសកម្ពុជា រយៈពេល ៩ ខែ ឆ្នាំ២០១៩ មានចំនួន ៣២៩ អគារ។ ក្នុងមានអគារចាប់ពី ៥ ជាន់ទៅ ៩ ជាន់មានចំនួន ១៦៦ អគារ ពី ១០ ជាន់ទៅ ១៩ ជាន់ មានចំនួន ៩៧ អគារ ពី ២០ជាន់ទៅ ២៩ ជាន់មានចំនួន ៣៩ អគារពី ៣០ ជាន់ទៅ ៣៩ ជាន់មានចំនួន ១៦ អគារ និងពី ៤០ ជាន់ឡើងទៅមានចំនួន ១១ អគារ។ ដោយឡែក សម្រាប់ក្រុងព្រះសីហនុមានគម្រោងអគារខ្ពស់ៗចាប់ពី ៥ ជាន់ឡើងក្នុងរយៈពេល ៩ ខែឆ្នាំ២០១៩ មានចំនួន ១២៥ អគារ។
ទាំងភាគីក្រសួងដែនដី និងអ្នកជំនាញផ្នែកអចលនទ្រព្យនៅតែចាត់ទុកថាការមានអគារខ្ពស់ៗច្រើននៅភ្នំពេញវាជាការល្អ ហើយស្ថានភាពអចលនទ្រព្យក៏ល្អផងដែរ ព្រោះវានឹងជួយទាក់ទាញអ្នកវិនិយោគបរទេសកាន់តែច្រើន ចូលមកវិនិយោគនៅកម្ពុជា៕
ស្វែងរកអចលនទ្រព្យសម្រាប់លក់នៅភ្នំពេញសូមចូលទៅកាន់ Realestate.com.kh ថ្ងៃនេះ!
Comments