សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចលុបចោលរាល់លក្ខខណ្ឌដែលដាក់ឱ្យធ្វើចត្តាឡីស័កសម្រាប់អ្នកធ្វើដំណើរ និងភ្ញៀវទេសចរណ៍ដែលបានចាក់វ៉ាក់សាំងទាំងស្រុង ទាំងជនជាតិខ្មែរ និងជនបរទេស ដែលចូលជាធរមានចាប់ពីថ្ងៃទី១៥ ខែវិច្ឆិកា នេះតទៅ ។
ក្នុងសារពិសេសផ្ញើជូនមន្ត្រី និងអាជ្ញាធរពាក់ព័ន្ធកាលពីថ្ងៃទី១៤ ខែវិច្ឆិកា សម្តេចតេជោ ហ៊ុន សែន មានប្រសាសន៍ថា គោលនយោបាយនេះនឹងអាចឱ្យប្រទេសបើកដំណើរការឡើងវិញបានពេញលេញ ហើយថាវាឆ្លុះបញ្ចាំងពីគោលនយោបាយរបស់ប្រទេសផ្សេងទៀតនៅក្នុងតំបន់ ។ សម្តេចក៏បានសង្កត់ធ្ងន់ថា អ្នកធ្វើដំណើរណាដែលមិនបានចាក់វ៉ាក់សាំងត្រូវនៅតែស្ថិតនៅដាច់ដោយឡែករយៈពេល ១៤ថ្ងៃ ។
សម្តេចមានប្រសាសន៍ឱ្យដឹងយ៉ាងដូច្នេះថា ៖ «ប្រទេសកម្ពុជាត្រូវបានចាក់វ៉ាក់សាំងស្ទើរតែពេញលេញជិត៨៨ភាគរយនៃចំនួនប្រជាជនសរុបប្រមាណ ១៦ លាននាក់ ។ ដូច្នេះមិនមានការតម្រូវឱ្យនៅដាច់ពីគេទៀតទេ លើកលែងតែអ្នកដែលមិនបានទទួលថ្នាំបង្ការដែលនៅតែត្រូវធ្វើការដាក់ឱ្យនៅដាច់ដោយឡែករយៈពេល១៤ថ្ងៃដូចមុន» ។
សម្តេចលោកបានមានប្រសាសន៍បញ្ជាក់ផងដែរថា អ្នកដំណើរដែលទទួលថ្នាំបង្ការពេញលេញនឹងត្រូវធ្វើតេស្តរហ័ស និងរង់ចាំលទ្ធផលនៅឯកន្លែងស្នាក់នៅរបស់ពួកគេតែម្តង ។ ប្រសិនបើលទ្ធផលអវិជ្ជមាន ពួកគេអាចធ្វើដំណើរទៅណាមកណាក្នុងប្រទេសកម្ពុជាបាន ៕
លោកអ្នកអាចព្រឹក្សាយោបល់អំពីការ ទិញ លក់ និងជួល អចលនទ្រព្យនានាបានគ្រប់ពេលដោយគ្រាន់តែទំនាក់ទំនងមកកាន់យើងខ្ញុំឥឡូវនេះបានតាមរយៈប៊ូតុងខាងក្រោម !!!
