ដឹងអត់ ! សំណង់បែបណាខ្លះដែលត្រូវស្នើសុំលិខិតអនុញ្ញាតសាងសង់?
ជាក់ស្តែងការសាងសង់លំនៅឋាន អគារខុនដូ អគារពាណិជ្ជកម្ម
វិស័យសំណង់ក្នុងប្រទេសកម្ពុជាកំពុងវិវឌ្ឍន៍ខ្លួនយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ជាក់ស្តែងការសាងសង់លំនៅឋាន អគារខុនដូ អគារពាណិជ្ជកម្ម ជាដើមមានការរីកចម្រើននៅពាសពេញរាជធានីភ្នំពេញ និងតាមបណ្តាខេត្តនានា ។
ប៉ុន្តែក្នុងនោះផងដែរ រាល់ការងារសាងសង់សំណង់ត្រូវធ្វើការស្នើសុំការអនុញ្ញាតសាងសង់ និងអនុលោមតាមបទប្បញ្ញត្តិបច្ចេកទេសសំណង់ និងការត្រួតពិនិត្យអនុលោមភាពតាមបទប្បញ្ញត្តិបច្ចេកទេសសំណង់ត្រូវអនុវត្តដោយអ្នកត្រួតពិនិត្យ និងបញ្ជាក់ដែលមានអាជ្ញាបណ្ណ ឬការអនុញ្ញាតផ្តល់ដោយក្រសួងរៀបចំដែនដី នគរូបនីយកម្ម និងសំណង់ ។
តើសំណង់បែបណាខ្លះដែលត្រូវធ្វើការស្នើសុំលិខិតអនុញ្ញាតសាងសង់?
ចំពោះការស្នើសុំលិខិតអនុញ្ញាតសាងសង់ត្រូវបានកំណត់ចំនួន៣ថ្នាក់ផ្សេងគ្នាទៅតាមទំហំនៃការសាងសង់ គម្រោងនីមួយៗ ៖
- ចំពោះសំណង់ដែលមានផ្ទៃក្រឡាកម្រាលសំណង់សរុបតូចជាង ឬស្មើ ៥០០ ម៉ែត្រការ៉េ និងមានកម្ពស់ទាបជាង ឬស្មើ៤ជាន់ (គិតទាំងជាន់ផ្ទាល់ដី និងគ្មានជាន់ក្រោមដី) ត្រូវធ្វើការស្នើសុំលិខិតអនុញ្ញាតសាងសង់នៅ ក្រុង-ស្រុក-ខណ្ឌ ។
- ចំពោះសំណង់ដែលមានផ្ទៃក្រឡាកម្រាលសំណង់ធំជាង ៥០០ ម៉ែត្រការ៉េ ដល់ ៣,០០០ ម៉ែត្រការ៉េ ទាបជាង ឬស្មើ១១ជាន់ (គិតទាំងជាន់ផ្ទាល់ដី និងគ្មានជាន់ក្រោមដី) ត្រូវធ្វើការស្នើសុំលិខិតអនុញ្ញាតសាងសង់នៅរាជធានី-ខេត្ត ។
- ចំពោះគម្រោងសាងសង់ណាដែលមានផ្ទៃក្រឡាកម្រាលសំណង់ធំជាង ៣,០០០ ម៉ែត្រការ៉េ ត្រូវទៅសុំការអនុញ្ញាតសាងសង់នៅក្រសួងរៀបចំដែនដី នគរូបនីយកម្ម និងសំណង់ផ្ទាល់តែម្តង ។
តើត្រូវត្រៀមឯកសារអ្វីខ្លះពេលស្នើសុំលិខិតអនុញ្ញាតសាងសង់?
ឯកសារចាំបាច់សម្រាប់ការស្នើសុំលិខិតអនុញ្ញាតសាងសង់មានដូចជា ៖
- ពាក្យស្នុំសុំលិខិតអនុញ្ញាតសាងសង់ (១ច្បាប់)
- ឯកសារបញ្ជាក់អត្តសញ្ញាណម្ចាស់សំណង់ (ថតចម្លង) (២ច្បាប់)
- ឯកសារបញ្ជាក់ការកាន់កាប់ដីស្របច្បាប់ (ថតចម្លង) (២ច្បាប់)
- សលាកបត្រក្បាលដី (២ច្បាប់)
- លិខិតបញ្ជាក់ព័ត៌មានសុរិយោដី (២ច្បាប់)
- ប្លង់ស្ថាបត្យកម្ម (៥ច្បាប់)
- របាយការណ៍ស្តីពីការត្រួតពិនិត្យ និងបញ្ជាក់គម្រោងប្លង់ស្ថាបត្យកម្ម (៥ច្បាប់)
- លិខិតបញ្ជាក់អនុលោមភាពនៃគម្រោងប្លង់ស្ថាបត្យកម្ម (៥ច្បាប់)
រយៈពេលនៃការស្នើសុំ ៖
- សម្រាប់លិខិតអនុញ្ញាតសាងសង់ ដែលត្រូវការអនុញ្ញាតពីរដ្ឋមន្ត្រីក្រសួងដែនដី ត្រូវចំណាយពេលអតិបរមា ៤៥ថ្ងៃ នៃថ្ងៃធ្វើការ ។
- សម្រាប់លិខិតអនុញ្ញាតសាងសង់ ដែលត្រូវការអនុញ្ញាតពីអភិបាលរាជធានី-ខេត្ត ត្រូវចំណាយពេលអតិបរមា ២៥ថ្ងៃ នៃថ្ងៃធ្វើការ ។
- សម្រាប់លិខិតអនុញ្ញាតសាងសង់ ដែលត្រូវការអនុញ្ញាតពីអភិបាលក្រុង-ស្រុក-ខណ្ឌ ត្រូវចំណាយពេលអតិបរមា ១៥ថ្ងៃ នៃថ្ងៃធ្វើការ ។
តើមានបញ្ហាអ្វីកើតឡើងបើសាងសង់ដោយមិនសុំការអនុញ្ញាត?
រាល់សំណង់ដែលសាងសង់ដោយគ្មានលិខិតអនុញ្ញាត សំណង់នោះនឹងនឹងត្រូវចាត់ទុកជាសំណង់ខុសច្បាប់ (បទល្មើស) ហើយការដ្ឋានសាងសង់នឹងត្រូវបានបញ្ឈប់ជាបន្ទាន់ ។ លើសពីនេះ បុគ្គលដែលក្លែងបន្លំឯកសារ ឬផ្តល់ព័ត៌មានមិនពិតដល់អាជ្ញាធរ ឬរដ្ឋមន្ត្រីដើម្បីទទួលបានលិខិតអនុញ្ញាតសាងសង់នឹងត្រូវទទួលខុសត្រូវព្រហ្មទណ្ឌតាមបទប្បញត្តិ នៃក្រមព្រហ្មទណ្ឌ ៕
អានរឿងនេះព្រោះអ្នកចង់ទិញ?
តួលេខទាំងនោះមកពីការផ្សាយផ្ទាល់ ធ្វើបច្ចុប្បន្នភាពរាល់ថ្ងៃ។ ចាប់ផ្តើមស្វែងរកនៅទីនេះ។
ស្វែងរកផ្ទះទាំងអស់ ›បន្ថែមពីបន្ទប់ព័ត៌មាន
ការណែនាំសម្រាប់ការស្នាក់នៅកម្ពុជាពេលចូលនិវត្តន៍
ឆែកឱ្យអស់កុំខ្លាច ! មុនពេលទិញផ្ទះបុរីអ្នកត្រូវដឹងឱ្យច្បាស់នូវឯកសារផ្លូវច្បាប់ទាំង៥នេះ
មើលឱ្យច្បាស់សិន ! ទិញដីឡូត៍អាចធ្វើឱ្យអ្នកជួបគ្រោះ ឬលាភបានបើមិនដឹងរឿង១នេះ