សក្តានុពលនៃវិស័យដីធ្លីតាមបណ្តោយផ្លូវជាតិលេខ៣កំពុងមានសន្ទុះខ្លាំងបើធៀបទៅនឹងតំបន់ផ្សេងៗ ។ តម្លៃដីធ្លីក្នុងចំណុចផ្លូវជាតិលេខ៣ហាក់មានការប្រែប្រួលខ្លាំង ស្របពេលដែលលំហូរគម្រោងសាងសង់ ឧស្សាហកម្ម រោងចក្រ សហគ្រាស ធុនតូចធំ បុរី សាងសង់បន្តកន្ទុយគ្នាដែលធ្វើឱ្យតម្លៃដីនៅតាមបណ្តោយផ្លូវជាតិលេខ៣មានការកើនឡើង ។
ក្នុងនោះផងដែរ អ្នកជំនាញវិស័យអចលនទ្រព្យបានបង្ហាញអំពីតំបន់ដែលមានសក្តានុពលខ្ពស់សម្រាប់ការសាងសង់លំនៅឋានដែលមានតម្លៃចន្លោះ៥ទៅ៦ម៉ឺនដុល្លារ គឺនៅតំបន់ក្បែរផ្លូវជាតិលេខ៣ (ភ្នំពេញ-កំពត) ។
លោកឧកញ៉ា គីម ហ៊ាង អ្នកជំនាញអចលនទ្រព្យបានឱ្យដឹងថា បច្ចុប្បន្នតម្លៃដីធ្លីនៅតាមបណ្តោយតំបន់ផ្លូវជាតិលេខ៣គឺមានតម្លៃសមរម្យដែលនេះជាកត្តាអំណោយផលខ្ពស់សម្រាប់អ្នកវិនិយោគអចលនទ្រព្យដែលចង់សាងសង់លំនៅឋានលក់ដែលមានតម្លៃត្រឹម៥ទៅ៦ម៉ឺនដុល្លារ ។
បច្ចុប្បន្ននេះ លំនៅឋានលក្ខណៈផ្ទះជាប់ដីកំពុងតែមានតម្រូវការខ្ពស់នៅក្នុងប្រទេសកម្ពុជា ដែលនេះជាឱកាសបំផុតសម្រាប់អ្នកវិនិយោគអចលនទ្រព្យប្រភេទលំនៅឋានដែលមានតម្លៃទាបអាចទទួលបានផលប្រយោជន៍ច្រើនពីតម្រូវការលំនៅឋាននេះ ៕
Comments