ការខ្ចីលុយធនាគារ ឬគ្រឹះស្ថានមីក្រូហិរញ្ញវត្ថុដើម្បីទិញផ្ទះ (ឥណទានទិញផ្ទះ) គឺជាជម្រើសដែលកំពុងមានការពេញនិយមមួយពីសំណាក់អតិថិជនដែលស្វែងរកទិញលំនៅឋាននាពេលបច្ចុប្បន្ន ។ កម្ចីធនាគារដើម្បីទិញលំនៅឋានបានអនុញ្ញាតឱ្យម្ចាស់ផ្ទះជាច្រើនដែលមិនធ្លាប់មានលទ្ធភាពទិញផ្ទះពីមុនបែរជាអាចទិញបាន ទោះបីជាពួកគេមិនមានប្រាក់សន្សំគ្រប់គ្រាន់នឹងតម្លៃផ្ទះក៏ដោយ ។
ថ្វីបើការខ្ចីប្រាក់ដើម្បីទិញផ្ទះគឺជារឿងសាមញ្ញ និងមិនមែនជារឿងថ្មីក៏ពិតមែន ប៉ុន្តែវាមានចំណុចសំខាន់ៗមួយចំនួនដែលលោកអ្នកត្រូវដឹងជាមុនដើម្បីសន្សំពេលវេលា និងថវិការរបស់លោកអ្នកក្នុងការដាក់ពាក្យស្នើកម្ចីទាំងនោះ ។ ខាងក្រោមនេះគឺឯកសារសំខាន់ៗដែលលោកអ្នកគួរដឹងមុនពេលដាក់ស្នើកម្ចីសម្រាប់ទិញផ្ទះ ៖
ទី១. ប្រភពចំណូលរបស់ខ្លួន
ជាទូទៅអ្នកដែលអាចមានលទ្ធភាពស្នើសុំកម្ចីដើម្បីទទួលបានការអនុម័តពីខាងធនាគារ គឺជាបុគ្គលដែលមានប្រាក់ចំណូលត្រឹមត្រូវ ។ ក្នុងនោះបុគ្គលស្នើសុំកម្ចីអាចមានប្រភពចំណូលបែងចែក ជាប្រភេទណាមួយក្នុងចំណោមទាំងពីរយ៉ាងគឺ ចំណូលពីប្រាក់បៀរវត្ស និងចំណូលពីរបរអាជីវកម្ម ។
ក/. ចំណូលពីប្រាក់បៀរវត្ស (ប្រាក់ខែ)
សម្រាប់លោកអ្នកដែលមានចំណូលជាប្រាក់បៀរវត្សឯកសារដែលលោកអ្នកត្រូវមានឬរៀបចំមានដូចជា ៖
• សៀវភៅធនាគារ ឬរបាយការណ៍ធនាគារ ឬលិខិតទទួលប្រាក់ខែតិចបំផុត៣ខែចុងក្រោយ
• កិច្ចសន្យាការងារ ឬលិខិតបញ្ជាក់ការងារចេញដោយក្រុមហ៊ុន
• ប្រវត្តិរូបសង្ខេប
• អត្តសញ្ញាណបណ្ណ ឬលិខិតឆ្លងដែន
• កិច្ចសន្យាទិញលក់ ឬពង្រៀងកិច្ចសន្យាទិញលក់
• លិខិតអនុញ្ញាតឱ្យធនាគារឆែកមើលប្រវត្តិឥណទានរបស់លោកអ្នក (ជាទូទៅធនាគារជាអ្នករៀបចំឯកសារជូនលោកអ្នកដោយលោកអ្នកត្រូវផ្តិតមេដៃដើម្បីអនុញ្ញាត)
ខ/. ចំណូលពីមុខរបរ ឬជំនួញផ្ទាល់ខ្លួន
សម្រាប់លោកអ្នកដែលមានចំណូលពីមុខរបរអាជីវកម្ម ឯកសារដែលលោកអ្នកត្រូវមាន ឬរៀបចំមានដូចជា៖
• ប៉ាតង់ចុងក្រោយ
• អាជ្ញាប័ណ្ណលើមុខរបរ
• លក្ខន្តិកៈក្រុមហ៊ុន ឬវិញ្ញាបនបត្រក្រុមហ៊ុន
• សៀវភៅធនាគារ ឬរបាយការណ៍ធនាគារ
• របាយការណ៍ហិរញ្ញវត្ថុប្រចាំឆ្នាំរយៈពេល២ឆ្នាំចុងក្រោយ
• វិក័យប័ត្រទិញ ឬលក់៣ខែចុងក្រោយ
• ព័ត៌មានពីក្រុមហ៊ុន (បើមាន)
• អត្តសញ្ញាណប័ណ្ណ ឬលិខិតឆ្លងដែន
• កិច្ចសន្យាទិញលក់
• លិខិតអនុញ្ញាតឱ្យធនាគារឆែកមើលប្រវត្តិឥណទានរបស់លោកអ្នក (ជាទូទៅធនាគារជាអ្នករៀបចំឯកសារជូនលោកអ្នក ដោយលោកអ្នកត្រូវផ្តិតមេដៃដើម្បីអនុញ្ញាត)។
ទី២. ឯកសារផ្សេងៗ
គួរបញ្ចាក់ថា ឯកសារដែលមានរៀបរាប់ខាងលើ គឺជាឯកសារដែលធនាគារនីមួយៗក្នុងប្រទេសកម្ពុជានិយមតម្រូវឱ្យមាននៅពេលដែលដាក់ស្នើឥណទានជំហានដំបូងបង្អស់។ ប៉ុន្តែនៅពេលដែលធនាគារបានសិក្សាជាក់លាក់ទៅលើករណីរបស់លោកអ្នក ជូនកាលពួកគេអាចនឹងស្នើសុំឱ្យអ្នករៀបចំឯកសារច្រើនជាងនោះ ដោយមើលតាមស្ថានភាពជាក់ស្តែង ។
ឧទាហរណ៍ ៖ ប្រសិនបើលោកអ្នកមានកម្ចីរួមជាមួយភាគីម្នាក់ទៀត ហើយភាគីម្នាក់ទៀតជាជនបរទេស ខាងធនាគារអាចនឹងស្នើសុំដល់ទិដ្ឋាការស្នាក់នៅរបស់ពួកគេជាដើម។ ជួនកាល មានធនាគារខ្លះក៏អាចស្នើសុំ លិខិតបញ្ជាក់ភាពនៅលីវ ប្រសិនជាលោកអ្នកមិនទាន់រៀបអាពាហ៌ពិពាហ៌ ។
ក្រៅពីឯកសារទាំងនេះ នៅមានសំនុំឯកសារជាច្រើនមុខទៀត ដែលលោកអ្នកនឹងត្រូវរៀបចំ ចុះហត្ថលេខា និងផ្តិតមេដៃ ដែលភាគច្រើនគឺជាការរៀបចំរវាងភាគីខាងធនាគារ និងខាងម្ចាស់ផ្ទះ (ជាពិសេសប្រសិនជាលោកអ្នកទិញផ្ទះក្នុងបុរីជាដើម) ។ លើសពីនេះទៅទៀត លោកអ្នកក៏អាចតម្រូវឱ្យផ្តល់ព័ត៌មានអំពីគេហដ្ឋានដែលអ្នកបានទិញឱ្យបានពិស្តារ ។ ឧទាហរណ៍ រូបថតឬវីដេអូពីស្ថានភាពសំណង់ រូបស្ថាបត្យកម្មខាងក្រៅ ផែនទីផ្ទះ ។ល។
ដោយសារតែធនាគារនីមួយៗអាចនឹងតម្រូវឱ្យភាគីអ្នកខ្ចីរៀបចំឯកសារផ្សេងៗគ្នាបន្តិចបន្តួច ដូច្នេះលោកអ្នកអាចត្រួតពិនិត្យតម្រូវការរបស់ធនាគារនោះឱ្យបានម៉ត់ចត់ ដើម្បីចៀសវាងចំណាយពេលច្រើនក្នុងការរៀបចំព័ត៌មានទាំងនោះ ៕
Comments