អគារការិយាល័យកើនឡើង ស្របពេលការវិនិយោគពីបរទេសឈានជើងចូលកម្ពុជា

ការផ្គត់ផ្គង់អគារការិយាល័យនៅភ្នំពេញបានបន្តកើនឡើងយ៉ាងខ្លាំងនៅឆ្នាំនេះ ដោយសារកំណើនចំនួនក្រុមហ៊ុនថ្មីចូលធ្វើអាជីវកម្មនៅកម្ពុជា ជាពិសេសក្រុមហ៊ុនវិនិយោគផ្ទាល់ពីបរទេស។

យោងតាមរបាយការណ៍ថ្មីមួយពីក្រុមហ៊ុនផ្គត់ផ្គង់សេវាអចលនទ្រព្យ CBRE អគារការិយាល័យនៅភ្នំពេញបានកើនដល់ផ្ទៃក្រលាសរុប ៣៥៩,៣០០ ម៉ែត្រការ៉េ (បូកបញ្ចូលស្តុកដែលមានស្រាប់តាំងពីឆ្នាំកន្លងទៅ) គិតត្រឹមដំណាច់ខែមិថុនាឆ្នាំនេះ គឺកើនឡើង ១២ ភាគរយពីត្រឹម ៣២០,៩០០ ម៉ែត្រការ៉េកាលពីដំណាច់ខែមិថុនាឆ្នាំ ២០១៨។

កញ្ញា គីម គីនកេសា អ្នកវិភាគជាន់ខ្ពស់របស់ CBRE បានឲ្យដឹងថាតម្រូវការការិយាល័យអាជីវកម្មបានកើនឡើងគួរឲ្យកត់សម្គាល់នៅភ្នំពេញក្នុងប៉ុន្មានឆ្នាំចុងក្រោយនេះ ស្របពេលការផ្គត់ផ្គង់បានកើនឡើងយ៉ាងខ្លាំង។ កញ្ញាបានលើកឡើងថា អត្រាអ្នកជួលមានរហូតដល់ទៅ ៨៥ ភាគរយ នៃការផ្គត់ផ្គង់សរុប។

កញ្ញា កេសា បានបញ្ជាក់ថា៖ «ក្រុមហ៊ុនសួរព័តមានដើម្បីជួលទីតាំងភាគច្រើនដែលយើងបានទទួលក្នុងរយៈពេល ១២ ខែចុងក្រោយនេះគឺមកពីក្រុមហ៊ុនអន្តរជាតិមកពីប្រទេសចិន សិង្ហបុរី ជប៉ុន ម៉ាឡេស៊ី និងបណ្តាប្រទេសផ្សេងទៀតនៅតំបន់អាស៊ីប៉ាស៊ីហ្វិក»។ កញ្ញាបន្តថា ក្រុមហ៊ុនភាគច្រើនកំពុងស្វែងរកការិយាល័យដែលមានផ្ទៃក្រលាចន្លោះពី ១០០ ម៉ែត្រការ៉េ ទៅ ៣០០ ម៉ែត្រការ៉េ។

យោងតាម CBRE ក្នុងអំឡុងពេលពីខែ មករា ដល់ ខែមិថុនា ឆ្នាំនេះ ការជួលផ្ទៃក្រលាសម្រាប់ការិយាល័យសរុប មានទំហំ ៦,៥០០ ម៉ែត្រការ៉េ កើនឡើងពីរដងពីត្រឹម ៣,១០០ ម៉ែត្រការ៉េ ក្នុងរយៈពេលដូចគ្នាឆ្នាំ ២០១៨។

របាយការណ៍របស់ក្រុមហ៊ុននេះបានកំណត់ប្រភពការិយាល័យជាបីថ្នាក់ រួមមានកម្រិត A កម្រិត B និងកម្រិត C។ យោងទៅតាមកញ្ញា កេសា ការិយាល័យលំដាប់ C មានអត្រាទំនេរទាបជាងគេ ដោយមានត្រឹម 7 ភាគរយប៉ុណ្ណោះ តែនិន្នាការថ្មីមួយបានកើតឡើងដោយសារតម្រូវការកំពុងផ្លាស់ប្តូរឆ្ពោះទៅរកការិយាល័យកម្រិត B។

Chat of the number of total office space

ស្របពេលមានកំណើនអគារការិយាល័យ ការផ្គត់ផ្គង់អគារប្រភេទនេះក៏កំពុងមានភាពចម្រុះ និងសំបូរបែបជាងមុនដែរ គឺអគារការិយាល័យប្រភេទសហកម្មសិទ្ធ។

យោងតាមរបាយការណ៍របស់ CBRE អគារការិយាល័យសហកម្មសិទ្ធបានបង្ហាញខ្លួននៅរាជធានីភ្នំពេញកាលពីឆ្នាំមុន។ បច្ចុប្បន្ននេះមានការិយាល័យប្រភេទនេះចំនួនសរុប ៤ ម៉ឺនម៉ែត្រការ៉េក្នុងរាជធានី។

ទោះយ៉ាងណាចំនួនសរុបត្រូវបានគេរំពឹងថានឹងឈានដល់ជិត ១០០,០០០ ម៉ែត្រការ៉េនៅចុងឆ្នាំនេះ ហើយនឹងបន្តកើនដល់ ៦០០,០០០ ម៉ែត្រការ៉េនៅឆ្នាំ ២០២២ ។

លោក លឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍ថាការបន្តរីកលូតលាស់នៃការិយាល័យនៅកម្ពុជាឆ្លុះបញ្ចាំងពីសកម្មភាពរីកចម្រើនការវិនិយោគដោយផ្ទាល់ពីបរទេស (FDI) និងបង្ហាញថាក្រុមហ៊ុនថ្មីនៅតែបន្តបង្កើតខ្លួននៅកម្ពុជា។

លោកបន្តថា៖ «បរិយាកាសវិនិយោគនៅកម្ពុជានៅតែមានភាពទាក់ទាញ ហើយយើងទទួលបានព័ត៌មានអំពីក្រុមហ៊ុនថ្មីដែលបង្កើតថ្មីស្ទើរតែរៀងរាល់ថ្ងៃ»៕

របាយការណ៍របស់ CBRE មិនបានរាប់បញ្ចូលការិយាល័យធ្វើការរួមគ្នា (co-working space) ទេ ស្របពេលទីតាំងការិយាល័យធ្វើការរួមគ្នាក៏កំពុងពេញនិយមដែរនៅភ្នំពេញ ជាពិសេសសម្រាប់ក្រុមហ៊ុនទើបបង្កើតថ្មីដែលត្រូវការកន្លែងធ្វើការតូចៗ និងមានថ្លៃឈ្នួលទាប។

ស្វែងរកការិយាល័យសម្រាប់ជួលនៅក្នុងទីក្រុងភ្នំពេញ ឬខុនដូសម្រាប់លក់នៅក្នងទីក្រុងភ្នំពេញ នៅថ្ងៃនេះ!